Writen by Qaran News |

Waxa la sheegay in gudoomiyaha maxkamada gobolka Maroodijeex Garsoore Cabdi Qawdhan uu ku gacansaydhay inuu gal dacwadeed u furo xildhibaan Dhakoolkii oo aanay golihiisu xasaanadii ka xayuubin, kaasi oo saaka la geeyay maxkamadda isagoo weliba labada gacmood ka silsiladaysan oon laga xishoon sharciga, mudanaha iyo ummaddii uu matalaayey ee reer Sool iyo guud ahaan shacabka reer Somalilandba.
Ileyn saban walba wax uun baa laga sahaydaayee, sabankan xun ee boolisku noqday kuwa aan xitaa madaxda khaatuma xumaysanaysa u sharxin waxa ceebi ka soo gaadhi doonto iyo halka ay tahay in amarka looga beydhi karo oo uu ku hirgeli karo.
Nasiib wanaag waxa muuqatay maanta mar kale rajada shacabka reer Somaliland ee ah in dhalin yarada ka hawlgasha garsoorku aanay ahayn kuwii hore ee ee shaabada weynaa ee cidii xukuumaddu dabada ka wado xabsiga isu dhaafin jiray.
Cabdi Qadhani waxa uu bilay quruxdii qaranka Somaliland ee ahayd dal dimoqraadiya oo leh hay’ado is ilaaliya,kuwaasi oo awood u leh inay dalkan ka hor istaagaan hogaamiye kasta oo leh damac keligii taliyenimo oo u hamuun qaba inuu dulaysto ummaddan daalan ee beelaha iyo ardaayada loo kala qaybiyay, si loo xukumo oo iyaga laysugu mashquuliyo.
Inkastoo gudoomiyaha maxkamada gobolka Maroodijeex ceebtii ka fogeeyay garsoorkii qaranka, bal waxa hadda su’aali la taagan tahay waxa gudoomiyihii dhalinyarada ahaa ee maxkamada sare ee dalka haystay uu ka yeelo, waxana loo joogi doonaa in sidiisii uu xilka si ku meel gaadh ah uga qaado garsooraha ceeb-diidka ah, sidii ku dhacday Garsoore Dalmarkii ka gaws adaygay in muwaadin gobol kale laga soo qabtay lagu maxkamdeeyo Hargeysa,iyadoo Burcadii laga keenay aan balaayo lagu ogayn.
Inta maamulka Muuse uu jirayaa waa dhawr sano, haseyeeshee waxa qormaysa taariikh. Waxa aan walaalkay sharciyaqaan Aaden Xaaji Cali u sheegi lahaa in aanay sumcadiisa cidi la lahayn iyo aakhiradiisa, islamarkaana ay tahay inuu dhaxal reebo una nasteexeeyo weliba hogaanka ummaddu dooratay een qoriga caaradiisa ku Iman.
Kolay sida saaka muuqatay rag baa leh ‘ waar saw la noolaadee ‘.
Weli shacabkan damiirku kama wada dhiman.

Mustafe Issa (Mustafe Shiine)