Siyaasadii dib u hagaajinta soomaaliya ma shaqeynayso, Ingiriisku waa inuu u jeestaa aqoonsiga Somaliland” Xildhibaan Stuart Polak
London(Qaran news)-Xildhibaan Stuart Polak ayaa ugu baaqay xukuumada Ingiriiska inay u soo jeesato aqoonsiga Somaliland si ay wax ugu kordhiso xasilloonida gobolka.
Dood aqalka Odeyaasha Ingiriisku ka yeesheen siyaasada Arrimaha dibeda ayuu xildhibaan Polak yidhi;
“Masaafo aad u yar ayey Somaliland u jirta xeebaha Yaman ee rabshadaha iyo qaska ka jirto. Somaliland waxay leedahay 850 kilomitir oo xeebta badda cas ah oo aan wax budhcad-badeed ahi ka jirin; taasna waxa loo nisbayn karaa dimuquraadiyadda reer galbeedka u janjeedha oo ah Somaliland. 1dii January, Itoobiya, oo ah saaxiibka muhiimka ah ee UK, ayaa heshiis is-afgarad ah la saxeexatay Somaliland, kaas oo ay Itoobiya si rasmi ah u aqoonsanayso Somaliland beddelkeedana ay Itoobiya helayso saldhig badda cas. Arrintan ayaa waxaa ansixiyay baarlamaanka Itoobiya, waxaana arrintan si dhab ah uga hadlay dalal kale oo caan ah oo Afrikaan ah. Waxaan u soo jeedinayaa saaxiibkay Xoghayaha Arrimaha Dibedda inuu si degdeg ah u eego horumarkan wanaagsan.
Xildhibaan Polak ayaa sheegay in siyaasadii dib u habaynta Soomaaliya shaqeyn weyday, loona baahan yahay xal macquul ah.
“In Soomaaliya dib loo soo celiso way shaqeyn weyday. Dunidu way isbedeshay oo way soo dhamaatay siyaasadeenii “Soomaaliya keliya”, ee dhalatay 1961. Waxa la joogaa wakhtigii ay siyaasadeenu isbedesho. Waxaan rajaynayaa in saaxiibkayga sharafta leh ee Xoghayaha Arrimaha Dibedda uu heli doono wakhti uu ku aqoonsado oo uu ku garab istaago wax qabadyada Somaliland ee xasiloonida iyo nabadgelyada gobolka, isaga oo hubinaya in doorkeeda muhiimka ah aan la ilduufin ama aan la dhayalsan karin.
