Wasaaradda Horumarinta Maalgashiga iyo Warshadaha Somaliland ayaa shalay heshiis is-afgarad (MoU) la saxeexatay shirkadda dalka Ingiriiska laga leeyahay ee Nubian Shield Resources Ltd, kaas oo diiradda saaraya xoojinta iskaashiga dhinacyada sahaminta, horumarinta iyo maalgashiga khayraadka macdanta dalka.
Heshiiska is-afgarad ee ay kala saxeexdeen Wasaaradda Horumarinta Maalgashiga iyo Warshadaha Jamhuuriyadda Somaliland iyo shirkadda Nubian Shield Resources Ltd waxay ka tarjumaysaa dadaallada joogtada ah ee lagu horumarinayo khayraadka dabiiciga ah iyo soo jiidashada maalgashiga shisheeye.
Muddooyinkii u dambeeyey, Somaliland waxay xoogga saartay sidii ay uga faa’iidaysan lahayd khayraadkeeda dabiiciga ah iyadoo la raacayo hannaan hufan oo waafaqsan siyaasadaha qaranka iyo halbeegyada caalamiga ah. Heshiiskan cusub wuxuu qayb ka yahay qorshahaas, isaga oo horseedi kara fursado cusub oo la xidhiidha sahaminta macdanta, gudbinta aqoonta iyo tiknoolajiyadda casriga ah, iyo kobcinta jawiga maalgashiga.
Sidoo kale, iskaashiyada noocan ahi waxay muhiim u yihiin abuurista shaqooyin cusub iyo dhiirrigelinta dhaqdhaqaaqa dhaqaale ee dalka. Marka maalgashi tayo leh lagu daro khayraad dabiici ah isla markaana si habboon loo maareeyo, waxaa suuragal ah in si togan looga faa’iidaysto faa’iidooyin dhaqaalaha iyo khayraadka guud ee dalka.
Sidoo kale, heshiiska oo ay si rasmi ah u kala saxeexdeen Wasiirka Wasaaradda Horumarinta Maalgashiga iyo Warshadaha, Siciid Maxamed Buraale, iyo wakiilka shirkadda ee Somaliland, Cabdiqaadir Cali. wuxuu astaan u yahay himilada Somaliland ee ku wajahan horumar dhaqaale oo ku salaysan maalgashi, aqoon, iyo ka faa’iidaysi hufan oo khayraadka dabiiciga ah, iyadoo la hiigsanayo koboc waara iyo fursado dhaqaale oo ballaadhan mustaqbalka.
