“Awdal waxay u Baahan Tahay wixii la wada lahaa siday u Qaybsan tahay in dib loogu Noqdo” Xil.Mukhtaar Xasan Maydhane
Hargeysa(Qaran news)- Xildhibaan Mukhtaar Xasan Maydhane oo ka tirsan Golaha Wakiillada Somaliland ayaa sheegay in Awdal u baahan tahay in wixii reer Somaliland wada lahaayeen siday u qaybsan tahay dib loogu noqdo.
Sidaasna wuxuu ku sheegay qoraal uu ku baahiyay baraha bulshada, qoraalkaasi oo u dhingnaa sidan:-
“Tibaax Ingiriisi ah ayaa tidhaa, “Adding insult to injury,” oo loo adeegsado marka waxyeelo laguugu daro aflagaado iyo cay. Sidaas waxa ka dhigan kuwa Awdal wax hala siiyo leh, ee qaarkoodna wanaagsanidooda ku muujiya isleh. Awdal uma baahna wax la siiyo. Awdal waxay u baahan tahay wixii aan wada lahayn sida ay u qaybsan yihiin maanta inaan dib isula eegno oo sida aan u kala qaadanayno isla garano. Awdalna wax ma siinaysid, Awdalna wax kuma siinayso. Su’aashu waa sideen u wada leenahay oo aan u kala leenahay?
Inta aydaan qaadan doorka u hadlidda Awdal, bal horta dhegaysta reer Awdal. Reerihiina, reer Awdal iyo guud ahaanba reer Soomaalilaan markaas baad wax tari kartaan. Derejo lagama helayo Awdal “waxayaga” hala siiyo. Oo weliba reer Awdal lagagama helayo. Reer Awdalna iyagaa ku filan inay cabbiraan waxay rabaan oo cidna magan ugama aha.”
