Soomaaliya ayaa ugu baaqday waddamada Carabta inay adeegsadaan xidhiidhkooda iyo awooddooda diblomaasiyadeed si looga hortago in aqoonsiga ay Israa’iil siisay Somaliland uu isu beddelo olole ay waddamada kale ee caalamkuna ku daydaan oo ay si rasmi ah u aqoonsadaan Somaliland, sida uu shaaciyay Wasiiru-dawlaha Arrimaha Dibadda iyo Iskaashiga Caalamiga ah ee Soomaaliya, Mudane Cali Maxamed Cumar (Cali Balcad)
Wareysi uu siiyay wargeyska *Asharq Al-Awsat* ee fadhigiisu yahay Bariga Dhexe, ayuu Wasiiru-dawlaha Arrimaha Dibadda, Mudane Cali Maxamed Cumar, ku sheegay in Soomaaliya ay xidhiidh toos ah la leedahay maamulka Madaxweynaha Mareykanka Donald Trump, isagoo xusay in Soomaaliya ay muujin doonto sida ay uga soo horjeeddo aqoonsiga ay Israa’iil siisay Somaliland.
Wuxuu intaas ku daray in Soomaaliya ay si dhow ula socoto dood kasta oo ku saabsan aqoonsi cusub.
Wasiiru-dawlaha Arrimaha Dibadda ayaa sidoo kale shaaciyay in Israa’iil, oo xubin ka ah Qaramada Midoobay, ay noqotay waddankii ugu horreeyay ee si rasmi ah u aqoonsada Somaliland bishii Disembar 2025, isagoo xusay in labada waddan ay is-weydaarsadeen safiirro, isla markaana Somaliland ay si rasmi ah u furtay safaaraddeedii ugu horreysay ee dibadda oo laga furay magaalada Qudus (Jerusalem).
Wuxuu kaloo xusay in Madaxweynaha Somaliland uu u safray Israa’iil booqasho shaqo oo rasmi ah. Si kastaba ha ahaatee, wuxuu sheegay in aqoonsigan uusan weli dhalin mowjad aqoonsiyo caalami ah oo kale.
Wuxuu sheegay in dowladda Soomaaliya aysan u arkin aqoonsiga Israa’iil tallaabo calaamad uun ah, balse ay aaminsan tahay in tallaabo kasta oo dibadda ka timaada oo looga golleeyahay in lagu beddelo midnimada Soomaaliya ay yeelan karto cawaaqib xumo siyaasadeed iyo mid amni oo waaweyn.
Wuxuu sidoo kale xusay wax uu ku tilmaamay xiriirka diblomaasiyadeed iyo kan amniga ee ka dhexeeya Israa’iil iyo Somaliland, oo ay ku jirto kaalmada tababarka ciidamada amniga. Wasiiru-dawlaha ayaa ka digay isku-day kasta oo waddan shisheeye ku doonayo inuu saldhig militari ama mid sirdoon ka sameysto Soomaaliya iyadoo aysan jirin ogolaansho ka haysta Dowladda Federaalka, isagoo sheegay in militarimeynta arrinta Somaliland ay khatar ku noqon karto Soomaaliya iyo gobolka Geeska Afrika. Isagoo ka hadlaya mowqifka waddamada Carabta, Cali Maxamed Cumar ayaa sheegay in jawaab-celintii degdegga ahayd ee waddamada Carabta ee ku aaddan aqoonsiga Israa’iil ay ahayd mid muhiim ah, maadaama ay muujisay in go’aanka Israa’iil uusan beddelin mowqifka midaysan ee caalamiga ah iyo kan gobolka ee ku saabsan ilaalinta midnimada dhuleed ee Soomaaliya.
Si kastaba ha ahaatee, wuxuu xusay in Soomaaliya ay raadinayso tallaabooyin ka baxsan cambaareyn uun.
“Ujeeddadu ma aha oo kaliya in la soo saaro cambaareyn, balse waa in laga hortago in aqoonsiga dhinac keliya ah uu isu beddelo olole ballaaran,” ayuu yiri Cali Maxamed Cumar. …iyagoo ugu baaqaya waddamada Carabta inay si firfircoon uga faa’iidaystaan xidhuidhkooda diblomaasiyadeed iyo saamayntooda. Wuxuu ku dooday in midnimada Soomaaliya aysan ahayn arrin khuseysa Soomaaliya oo keliya, maadaama kala-baxa waddamada Carabta iyo Afrika uu noqon karo tusaale horseedi kara cawaaqib xumo.
