Washington,D.C. – Horumar la taaban karo, guddi-hoosaadka qoondaynta ee Aqalka Wakiilada Maraykanka ayaa ansixiyay miisaaniyad sanadeedka 2026-ka, taas oo ay ku jiraan qodobbo lagu xoojinayo hay’adaha dimuqraadiga ah ee Somaliland iyo kor loogu qaadayo awooddeeda amni. Talaabadan ayaa muujinaysa isbedel ku iman kara siyaasadda Maraykanka ee ku wajahan Somaliland oo raadinaysay aqoonsi caalami ah tan iyo markii ay kala soo noqotay madax-banaanideeda Soomaaliya 1991-kii.
Qoondaynta miisaaniyada waxa ay ujeedadeedu tahay in lagu taageero dawladnimada iyo kaabayaasha nabadgelyada Somaliland, taas oo ka tarjumaysa istaraatiijiyad ballaadhan oo Maraykanku kula macaamilayo Somaliland iyada oo uu jiro tartan-siyaasadeed oo sii kordhaya. Go’aankani waxa uu ku soo beegmay wakhti ay Somaliland siisay faa’iidooyin istiraatijiyadeed oo Maraykan ah, oo ay ka mid yihiin saldhig millatari oo laga galo badda cas iyo heshiisyada macdanta muhiimka ah, sida lagu sheegay Bloomberg July 30, 2025.
Ansixinta guddi-hoosaadka ayaa ah tallaabo loo qaaday si rasmi ah taageerada Maraykanku u siiyo Somaliland, taasoo saamayn ku yeelan karta xasilloonida iyo xidhiidhka caalamiga ah ee Geeska Afrika. Miisaaniyadda hadda waxa ay ku sii jeeddaa codaynta Golaha Wakiilada, taas oo muujinaysa inay suurtogal tahay inay korodho ku lug lahaanshaha Maraykanka ee Somaliland, taas oo qayb ka ah dadaalka uu ku doonayo inuu iskaga ilaaliyo quwadaha kale ee caalamka, sida Shiinaha, ee Afrika.
