Mid kamid ah diyaaradaha aan duuliyaha lahayn oo laga leeyahay dalka Ruushka ayaa ku dul dhacday guryo dabaq ah oo ku yaallay Romania, sida ay sheegtay wasaaradda difaaca dalkaasi subaxnimadii saaka, taas oo sababtay dab, isla markaana ay dhaawacmayn laba qof.
Drone-ka ayaa ku dhacay magaalada bari ee Galati xilli Ruushku uu weerarro ka waday gudaha Ukraine meel u dhow xadka, sida lagu sheegay bayaan ay wasaaraddu soo saartay.
Hay’adda Guud ee Gurmadka Degdegga ah ee Romania ayaa sheegtay in dhammaan walxihii qaraxa ahaa ee drone-ka saarnaa ay wada qarxeen, taas oo dab ka dhalisay dabaqa 10-aad ee dhismaha, kaas oo ahaa mid la deganaa.
Drones-ka Ruushka ayaa dhowr jeer uga tallaabay xadka dalka Romania oo xubin ka ah NATO muddadii afarta sano ahayd ee dagaalka Ukraine socday, balse tani waa markii ugu horreysay ee muwaadiniin Romanian ah ay waxyeello kasoo gaarto. Ruushka ayaan weli ka hadlin arrintaan.
Laba diyaaradood oo dagaal nooca F-16 ah ayaa la hawlgeliyay kadib markii drones-ka lagu arkay hawada Romania, sida ay sheegtay wasaaradda difaaca.
Kooxda maamusha hawada dalkaasi ayaa sheegtay in ay drone-ku kula socdayn raadaarka, “Mid ka mid ah drones-kan ayaa galay hawada Romania, waxaana raadaarku la socday ilaa qaybta koonfureed ee magaalada Galati, kadibna wuxuu ku dhacay saqafka dhisme dabaqyo ah, iyadoo saameynta dhicitaanku ay sababtay dab,” ayay wasaaraddu tiri.
Dhacdo bishii Abriil dhacday, drone kale oo Ruush ah ayaa khasaare hantiyeed ka geystay Galati, balse cidna kuma dhaawacmin.
