Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro) iyo weftigii uu hogaaminaayey ayaa galabta si ballaadhan loogu soo dhaweeyey magaalooyinka Dila iyo Boorama ee Gobolka Awdal
Bulshada reer Awdal ayaa si niyad-wanaag iyo farxad leh u soo dhaweeyey Madaxweynaha iyo weftigiisa, iyaga oo shucuurtooda ku muujiyey sida ay ugu faraxsan yihiin booqashada Madaxweynaha, iyaga oo ku tilmaamay in safarkiisu uu yahay mid muujinaya wadajirka iyo midnimada shacabka Somaliland.
Markii uu Madaxweynaha Jamhuuriyadda Somaliland soo gaadhay Gobolka Awdal, waxa uu si kal iyo laab ah u salaamay shacabka iyo madax dhaqameedka Gobalka , kuwaasi oo ku soo dhaweeyey Calanka Qaranka JSL iyo caleemo qoyan.
Madaxweynuhu inta uu ku sugan yahay magaalada Boorama, waxa uu kulammo muhiim ah la yeelan doonaa Madaxda heer Gobol iyo kuwa Degmo, wax-garadka, iyo qaybaha kala duwan ee bulshada reer Awdal. Kulamadaasi waxa diiradda lagu saari doonaa arrimaha horumarinta adeegyada bulshada, xoojinta wada-shaqeynta Hay’adaha Dawladda iyo bulshada rayidka ah, iyada oo laga wada hadli doono xoojinta nabadda, wada-jirka iyo midnimada ummadda reer Somaliland.
Dhanka kale, Madaxweynuhu waxa uu ka qayb geli doonaa Xafladda Qalin-jabinta Jaamacadda Camuud.
𝐀𝐋𝐋𝐀𝐀 𝐌𝐀𝐇𝐀𝐃 𝐋𝐄𝐇
𝐗𝐮𝐬𝐞𝐞𝐧 𝐀𝐚𝐝𝐚𝐧 𝐂𝐢𝐠𝐞 (𝐃𝐞𝐲𝐫),
𝐀𝐟𝐡𝐚𝐲𝐞𝐞𝐧𝐤𝐚 𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐉𝐚𝐦𝐡𝐮𝐮𝐫𝐢𝐲𝐚𝐝𝐝𝐚 𝐒𝐨𝐦𝐚𝐥𝐢𝐥𝐚𝐧𝐝
