NABADDA SOMALILAND: TIIRKA QARANIMADA IYO
MUSTAQBALKA BULSHADA
Nabaddu waa tiirka ay ku taagan yihiin wada-noolaanshaha, horumarka iyo jiritaanka bulsho
kasta. Waa hanti aan lagu qiimayn karin maal iyo magac, balse lagu garto xasilloonida, kalsoonida
iyo wanaagga ay dadku wadaagaan.
Somaliland waxay soo martay marxalado adag oo bulshada baray qiimaha nabadda. Dadaalladii
dib-u-heshiisiinta iyo dhismaha xasilloonida waxaa door muuqda ku lahaa hoggaanka dhaqanka,
oo ay weheliyeen waxgaradka, culimada, haweenka iyo qaybaha kale ee bulshada.
Suldaannada, ugaasyada, caaqillada iyo odayaasha dhaqanka Somaliland waxay weli bulshada ku
dhex leeyihiin masuuliyad muhiim ah. Waa dad laga filayo talo, dhexdhexaadin, isu-soo-dhoweyn
iyo ilaalinta xidhiidhka bulshada.
Dhaqankeenna waxaa qiimo weyn ku leh garta, garawshiyaha iyo isu-tanaasulka. Marka khilaaf
yimaaddo, waxaa muhiim ah in la dhegaysto dhinacyada, xaqa la dhowro, lana raadiyo xal lagu
wada qanci karo. Heshiiska wanaagsani ma aha oo keliya in muran la soo afjaro, balse waa in la
soo celiyo kalsoonidii iyo wada-noolaanshihii dadka.
Hoggaanka dhaqanka Somaliland waxaa maanta looga baahan yahay inuu sii xoojiyo kaalintiisa
nabadaynta, ka hortagga khilaafaadka iyo isku xidhka bulshada. Waxaa sidoo kale muhiim ah inuu
la shaqeeyo hay’adaha dawladda, isaga oo dhowraya sharciga, caddaaladda iyo xuquuqda
muwaadiniinta.
Nabaddu ma aha hawl la qabto marka colaad dhacdo oo keliya. Waa masuuliyad joogto ah oo u
baahan feejignaan, wada-tashi iyo in la qaboojiyo wax kasta oo keeni kara kala fogaansho bulsho.
Hoggaanka dhaqanka waxaa looga fadhiyaa inuu noqdo mid dadka isu keena, talada mideeya,
kana shaqeeya danta guud. Odaynimadu waxay qiimo yeelataa marka ay ku dhisan tahay
dhexdhexaadnimo, run-sheegid iyo u-turidda bulshada.
Somaliland nabaddeedu waa dhaxal ay jiilal badan ka qayb qaateen. Ilaalinteeduna waxay u
baahan tahay in hoggaanka dhaqanku sii wado kaalintiisa, bulshada inteeda kalena ay garab
istaagto dadaallada lagu xoojinayo wadajirka iyo xasilloonida.
Nabaddu waa tiirka qaranimada; hoggaanka dhaqankuna wuxuu leeyahay kaalintiisa
ilaalinta tiirkaas.
Mohamed Farah Tahar
Cilmi-baare Madax-bannaan | Aqoonyahan ku Takhasusay Maamulka iyo Qorshaynta |
