Wafdi ballaadhan oo ka socda Somaliland, oo uu hoggaaminayo Madaxweyne Cabdiraxmaan Maxamed Cabdillaahi (Cirro), ayaa isku diyaarinaya inay u safraan dalka Mareykanka labada toddobaad ee soo socda. Wafdiga waxaa ka mid ah wasiirro, xildhibaanno, mas’uuliyiin sarsare iyo wakiillo kale.
Bulshada reer Somaliland ee ku nool dalka Mareykanka ayaa iyaguna isu diyaarinaya inay soo dhaweeyaan Madaxweynahooda, kaas oo ah booqashadiisii ugu horreysay ee uu ku tago Mareykanka tan iyo markii uu xilka la wareegay.
Qodob aad muhiim u ah ayaa ah in xubnaha wafdigu ay ku safrayaan baasaboorrada Somaliland, kuwaas oo ay Safaaradda Mareykanku siisay fiisayaal. Tani waa tallaabo muhiim ah oo dhiirrigelin u ah baasaboorka Somaliland iyo kobaca xiriirka caalamiga ah ee ay dalku sameynayaan.
