๐๐๐๐๐ฑ๐ฐ๐๐ฒ๐ง๐๐ก๐ ๐๐๐ฆ๐ก๐ฎ๐ฎ๐ซ๐ข๐ฒ๐๐๐๐ ๐๐จ๐ฆ๐๐ฅ๐ข๐ฅ๐๐ง๐ ๐จ๐จ ๐ค๐ฎ๐ฅ๐๐ง ๐๐๐ซ๐๐๐๐ซ๐๐ง ๐ข๐ฒ๐จ ๐๐๐ซ-๐๐๐ซ๐ ๐๐ฅ๐ข๐ง ๐๐ก ๐ฅ๐ ๐ฒ๐๐๐ฌ๐ก๐๐ฒ ๐๐๐๐ข๐ข๐ซ๐ซ๐๐๐, ๐๐ซ๐ ๐๐ฒ๐ ๐ ๐ข๐ฒ๐จ ๐๐๐๐ข๐ข๐ซ-๐ค๐ฎ-๐ฑ๐ข๐ ๐๐๐ง๐ง๐๐๐ ๐ฎ๐ฎ ๐๐ก๐๐ฐ๐๐๐ง ๐ฑ๐ข๐ฅ๐๐ฅ๐ค๐ ๐ฎ ๐ฆ๐๐ ๐๐๐๐๐๐๐ฒ.
Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), ayaa kulan dardaaran iyo dardargelin hawleed ah la yeeshay Safiirrada, Ergayga iyo Safiir-ku-xigeennada uu dhawaan xilalka u magacaabay, isaga oo adkeeyey muhiimadda ay leedahay in xilalka diblomaasiyadeed loo guto si hufan, masuuliyad leh, isla markaana ku dhisan ilaalinta danaha, karaamada iyo sumcadda Qaranka JSL.
Madaxweynaha waxa kulanka ku wehelinayey Wasiirka Arrimaha Dibedda iyo Iskaashiga Caalamiga ah ee JSL, Mudane Cabdiraxmaan Daahir Aadan Bakaal.
Madaxweynuhu waxa uu xusay in xilalka Danjirennimadu aanay ku koobnayn metelaad rasmi ah oo keliya, balse ay yihiin masuuliyado Qaran oo xambaarsan magaca, jiritaanka dawladnimo, danaha istiraatiijiga ah iyo himilooyinka mustaqbalka ee Jamhuuriyadda Somaliland.
Waxa uu tilmaamay in xilalkaasi leeyihiin miisaan gaar ah, xilli ay bulshada caalamku si weyn ugu baraarugayso xaqiiqada dalnimo, dawladnimo iyo kaalinta istiraatiijiga ah ee ay Jamhuuriyadda Somaliland ku leedahay gobolka iyo dunida.
Madaxweynuhu waxa uu masuuliyiintan kula dardaarmay in ay xilalkooda u gutaan si xilkasnimo, karti, daacadnimo iyo haybad Qaran leh, isla markaana ay xoojiyaan xidhiidhka diblomaasiyadeed ee ay la leeyihiin waddamada loo igmaday, iyaga oo mudnaanta siinaya is-fahamka, iskaashiga, dano-wadaagga iyo kobcinta xidhiidho caalami ah oo wax-ku-ool ah oo Somaliland u horseeda fursado diblomaasiyadeed, siyaasadeed, dhaqaale iyo horumarineed.
Madaxweynaha JSL waxa kale oo uu Danjireyaasha ku adkeeyey in ay door muhiim ah ka qaataan mideynta iyo isku xidhka Jaaliyadaha reer Somaliland ee ku nool waddamada ay Qaranka wakiilka uga yihiin, si loo xoojiyo wadajirka bulshada, loo kobciyo ka qayb qaadashadooda hawlaha Qaranka, loona mideeyo awooddooda, waayo-aragnimadooda iyo xidhiidhadooda caalamiga ah si ay ugu adeegaan danaha Jamhuuriyadda Somaliland.
Dhankooda, Safiirrada, Ergayga iyo Safiir-ku-xigeennadu waxa ay Madaxweynaha u xaqiijiyeen sida ay uga goโan tahay gudashada waajibaadka diblomaasiyadeed ee loo igmaday, iyaga oo ballanqaaday in ay xilalkooda u gudan doonaan si daacadnimo, xilkasnimo, karti iyo hufnaan leh, mar walbana ay mudnaanta koowaad siin doonaan ilaalinta danaha, karaamada iyo sumcadda Qaranka Jamhuuriyadda Somaliland, isla markaana ay si joogto ah uga shaqayn doonaan xaqiijinta himilooyinka diblomaasiyadeed iyo danaha istiraatiijiga ah ee uu leeyahay Qaranka Jamhuuriyadda Somaliland.
